Suab Hmong Broadcasting, The communication sources for Hmong worldwide

Tus Qauv Paj Ntaub

Created on Monday, 31 August 2009 13:58

TUS QAUV PAJ NTAUB

Kuv niam, daim paj ntaub koj qhia kuv ua
Hnub no kuv rov muab nthuav los saib dua
Pom thawj ob peb koob ua koj qhia kuv xaws
Ua rau kuv tsim dheev nco koj tshaj plaws.

Kuv lub kua muag poob ntxaum zoj daim paj ntaub
Kuv thiaj quaj nroo saub seev yuj yees tuaj qhia koj paub
Daim mi paj ntaub koj qhia kuv tawm tus qauv laug
Ua cas tseeb nyob tshiab khiv ntawm kuv sab tes laug.

Koj twb tau ncaim lub ntiajteb tau ib xyoos ncig rov
Kuv nim nyob ua nkauj ntsuag tsis hnov koj xov
Saib daim paj ntaub nim ua rau kuv nco thaum koj nyob
Es koj tias mi ntxhias, “Nkaujyeeb, kuv muaj tus mob”.

Zaum no nws yuav tsis tso kuv tseg lawm mog,
Qhawg lias kuv niam puag, teev kua muag nrog
Ntseeg tsis tau tias kuv niam yuav tso kuv tseg
Nws lolus kawg yog nrhiav kom tau lub neej ruaj ntseg.

Daim mi paj ntaub, tawg paj paug ua cas koj nim tsis txawj tham
Yog koj txawj hais ntshe koj yuav teb tias koj niam hlub koj tshaj txhua yam
Thiaj qhia kom koj txawj ntos mi paj ntaub mos nyuj nyoos tau hnav
Kom koj mus nrhiav tau mi hluas nraug ntxim tshua los ua koj tus tav.

Ua cas xav zoj li, no ua rau kuv lub kua muag teev yuj yees tsis tu
Puas muaj mi ANGEL nyob qhov twg hnov kuv lub suab hu
Lub siab quaj dhi nco koj heev each and every day mog kuv niam siab zoo
Rau koj kuv yuav ua tus zoo ntxhais kom luag tsis txhob ncha lub moo.

Yuav muab daim mi paj ntaub koj qhia kuv xaws khaws ua ib zoo cia
Ua puav pheej tau qhia tej mi xeebleej xeebntxwv tias yog koj qhia
Cim tus qauv hlub uas tau los ua niamtub ib zaug hauv ntiaj teb tseg
Lwm tiam yuav nthuav daim paj ntaub ua pov thawj tias yog koj tej qub teg mog…
…....kuv niam siab zoo…sniffs……..sniffs
Dedicated to all the fans ua tsis muaj niam...

NkaujYeeb
8.31.2009