Suab Hmong Broadcasting, The communication sources for Hmong worldwide
Lub neej nyob teb chaws asmeslibkas yog ib lub neej twm zeej
Created on Friday, 06 June 2008 05:50
Nyob teb chaws Es Xias, Hmoob lub neej yog lub neej sib hlub haus sib ce, nyob sib pab puag xwb pwg, thiab ib leeg cev ib leeg noj yam sib hlub tuaj hauv nruab siab tuaj.
Thaum Hmoob tuaj nyob rau teb chaws asmeslibkas, lub neej sib hlub hauv sib ce li nyob teb chaws Es Xias tsis zoo sib xws thiab txawd lawm ntau. Tus niam tsis paub hlub tus txiv, tus txiv tsis paub hlub tus niam, cov me nyuam tsis paub hlub niam thiab txiv lawm. Yog muab xav txog lub neej nyob sib hlub hauv sib ce yog ib txoj kev tu siab thiab mob siab kawg nkaus. Puas tsim nyog cov ua niam ua txiv hlub tej me nyuam? Puas tsim nyog ob niam-txiv los sib cog lus nyob ua ke raws kev lig kev cai Hmoob uas yog them ib pob nqis taub hau?
Lub neej nyob teb chaws asmeslibkas yog ib lub neej nyob raws kev cai lij choj. Cov niam-txiv Hmoob uas paub coj thiab sib yoog ces lub neej tsis nco muaj kev ntxhov siab ntxhov ntsws. Cov niam-txiv Hmoob uas tsis paub sib yoog thiab nyias ua raws li nyias lub siab nyiam thiab tshaws ces lub neej yeej tawg ua rau muaj kev kub ntxhob ntau yam tshwm sim.
Txawm li cas los xij, nco ntsood tias lub neej nyob teb chaws asmeslibkas yog ib lub neej nyob ywj siab ywj ntsws. Tsuad yog koj tsis ua txhaum txoj cai xwb ces yeej tsis muaj leej twg yuav ua tau dab tsi rau koj. Thaum zoo li no lawm, peb yuav siv tsis tau peb lub neej uas peb ib txwm coj “xws li noj sib hlub haus sib ce” lawm. Txawm kuv yuav cev ib yam rau koj los yuav tsum tau nug koj seb koj puas kam lees tso. Yog koj tsis lees, kuv pheej yuam muab rau koj, koj muaj cai mus foob tau kuv rau nram chaws hais plaub. Thaum kawg kuv tseem yuav raug mus kawm qhov taub vim qhov kuv pheej yuam ntawd thiab. Peb yuav tau los nco ntsood tias YOG THAUM KOJ MUAJ KEV YWJ PHEEJ LAWM CES KOJ YUAV TSUM TAU NYOB UA NEEG TWM ZEEJ thiaj li tsis raug teeb meem. Qhov nyob ua neeg twm zeej tsis yog peb Hmoob kev xav thiab kev ntshaw uas peb ib txwm muaj los. Li no, peb Hmoob thiaj pheej niaj hnub raug plaub raug tug tias “DOMESTIC VIOLENCE”. Nyob rau hauv peb Hmoob lub neej, kev sib cav sib ceg tsis yog ib qhov yuav raug coj ib leeg twg coj mus kawm qhov taub tab sis nyob rau teb chaws asmeslibkas yog ib qhov raug mus kawm qhov taub yooj yim txog kev sib cav sib ceg ntawm niam-txiv Hmoob. Kuv tseem tab tom sau ib tsab xov xwm txog Hmoob lub neej vwm nyob teb chaws asmeslibkas yuav tso tawm hauv SHR tsis ntev no.
Nco ntsood, lub neej nyob teb chaws asmeslibkas txhob cai txoj kev cai lij choj los caum tau koj. Nyob raws txoj kev cai lij choj xwb. Txawm yuav ua rau yus mob siab npaum li cas los NCO NTSOOD TIAS “TXOJ SIA” NTAWM YUS YOG IB QHOV TSEEM CEEB TSHAJ PLAWS.