Articles

Hmoob Mis-nis-taus-vauv lub koob tsheej caij ntuj sov

Created on Monday, 25 August 2008 04:35

Hmoob Mis-nis-taus-vauv (Manitowoc) hauv xeev Viv-xaws-kaws-xees (Wisconsin) lub koob tsheej kev lom zem rau lub caij ntuj so nyob rau lub 8 hli ntuj hnub tim 23 thiab 24 xyoo 2008 pom tau tias muaj neeg tuaj koom coob huj sim. Muaj coob tshaj li ntawm 2000 tawm leej Hmoob nyob rau lwm lub nroog tau tuaj koom.

Tus nqi kag mus yog 3 daus las them rau ib tug neeg. Nyob rau sab hauv muaj kev lom zem sib tw ncaws pob, sib tw ntau pob, sib tw seev cev, thiab lwm yam. Muaj ntau lub khw tuaj muag khoom siv thiab khoom noj.

Kev sib tw ncaws pob nyob rau zaum no kuj muaj cov hluas thiab cov laus. Cov hluas kev sib tw ncaws pob yog yeej tau thawj tau 1200 daus las, yeej ob tau 500 daus las thiab yeej peb tau 200 daus las. Ntawm cov laus yog sib tw ncaws pob ua si ntawm kev yeej xwb yuav tsis tau dab tsi.

Hmoob Milwaukee pab tub ncaws pob ntawm cov laus tau tuaj koom kev sib tw ncaws pob nyob rau zaum no tib yam. Thaum kawg lawd yeej ob. Richard tus sawv cev ntawm Suab Hmoob Xovtooj Cua tau hais tias “kuj pom tau tias yog ib qhov lom zem xauv npho nrog rau tej qub phooj ywg uas ib txwm sib paub thiab tau sib koom ncaws pob tau 10 tawm lub xyoo dhau los. Richard yog ib tug tub ncaws pob ntawm cov laus tuaj ntawm lub nroog Milwaukee tuaj. Nws tau hais ntxiv tias “Yog ib qhov zoo heev uas rov tau tuaj pom tej phooj ywg uas ib txwm tau ncaws pob yav tas los thiab ua rau yus rov nco txog lub neej yav qub qab thaum ub”.